मित्रांनो, आजच्या काळात रासायनिक खते व कीटकनाशकांमुळे शेतमालाचा दर्जा खालावलेला दिसून येतो. याउलट सेंद्रिय शेतीमुळे मात्र शेतमालाचा दर्जा उंचावून निर्यातीसाठी पात्र बनविता येते. अशीच एक यशोगाथा आहे सातारा जिल्ह्यातील शेतकरी उद्धव बाबर यांची.
माण तालुक्यातील देवापूर येथील उद्धव बाबर हे पर्यावरणप्रेमी शेतकरी आहेत. त्यांनी आपल्या दीड एकरच्या शेतात केशर आंबा, हापूस, गुलाब्या आणि रायवळ जातीच्या 120 झाडांची लागवड केली आहे. या झाडांची लावण करतानापासूनच त्यांनी रासायनिक खते व कीटकनाशकांचा वापर पूर्णपणे टाळला आहे.
सेंद्रिय शेतीसाठी शासकीय योजनांचा लाभ घेत ठिबक सिंचन, गांडूळ खत, कंपोस्ट खत यांचा वापर करून त्यांनी नैसर्गिक पद्धतीनेच आंब्याची लागवड केली आहे. या सेंद्रिय पद्धतीमुळेच गेल्या दोन वर्षांपासून त्यांच्या आंब्याला निर्यातीसाठी आवश्यक असलेले सर्व निकष गाठता आले आहेत. याचाच परिणाम म्हणून त्यांना गेल्या वर्षी 250 प्रति किलो या दराने आंबा विकता आला.
सेंद्रिय शेतीमध्ये झाडांच्या बुंध्याभोवती विविध कडधान्ये, गोमुत्राची स्लरी वापरली जाते. मोहरफुलांच्या परागीभवनासाठी मधमाशा व फुलपाखरांना आकर्षित करण्यासाठी त्यांनी बागेच्या आसपास विविध फळझाडांची लागवड केली आहे. यामुळे मधमाशांचा आंबा बागेत वावर वाढला आहे.
उद्धव बाबर म्हणतात, "नैसर्गिक पद्धतीने पिकविलेला आंबा लवकर नासत नाही. रासायनिक कार्बाइडच्या वापरामुळे जलद गतीने पिकवलेल्या आंब्याचा रंग एकसारखा गडद असला तरी तो आरोग्यास घातक आहे आणि लवकर सडतो."
सेंद्रिय शेतीच्या या मार्गाने बाबर यांनी ऊसही घेतला असून त्याचे गुळ व काकवीही सेंद्रिय पद्धतीनेच उत्पादित केले आहेत. या सेंद्रिय मालाला बाजारात चांगली मागणी असल्याने त्यांना अधिक किंमत मिळते.
यावरून असे दिसते की, सेंद्रिय शेतीमुळे उत्पादनाचा दर्जा उंचावून निर्यातीसाठी पात्र बनविता येते आणि उच्च किंमतीही मिळवता येते. शेतकऱ्यांनीही उद्धव बाबर यांच्याप्रमाणे सेंद्रिय शेतीकडे वळावे आणि विषमुक्त शेती करून आरोग्यदायी अन्न उपलब्ध करून द्यावे, अशी अपेक्षा करतो.
तुमच्या सुचना व प्रतिक्रिया येथे नक्की लिहा! धन्यवाद!
0 टिप्पण्या